चुनाव बहिष्कार भन्ने मोहन वैद्यले पनि उम्मेदवार उठाए

चुनाव बहिष्कार गर्ने निर्णय गरेको मोहन बैद्य “किरण” नेतृत्वको क्रान्तिकारी माओवादीले स्थानीय तह निर्वाचनमा उम्मेदवारी दर्ता गराएको छ । सो पार्टीले मकवानपुर र उदयपुरका केही स्थानीय तहमा आज उम्मेदवारी मनोनयन गरेको हो ।

वैद्य समूहले हेटौँडा उपमहानगरपालिकामा बबिता उप्रेतीलाई मेयरको उम्मेदवार बनाएको छ । उदयपुरको गाईघाट नगरपालिका पनि सो पार्टीका तर्फबाट उम्मेदवारी परेको छ । दुवै ठाउँमा नेत्रविक्रम चन्द विप्लव नेतृत्वको नेकपाले उनीहरुलाई सघाउने बताइएको छ ।

यता,चुनाव उपयोगको नीतिलाई लिएर शीर्ष तहमै विवाद चर्किरहेका बेला विप्लव समूहले पनि आफ्नो प्रभाव रहेको र राजनीतिक महत्वका केही स्थानीय तहमा उम्मेदवारी दिएको छ । सर्लाही,सिन्धुली,चितवन, रोल्पालगायतका जिल्लामा विप्लव समूहले उम्मेदवार उठाएको हो ।

सर्लाहीको बागमति गाउँपालिकामा प्रहरीद्वारा नक्कली इन्काउन्टरमा मारिएका कुमार पौडेलकी श्रीमती धनकुमारी खड्का पौडेल मेयरमा उठेकी छन् । पौडेल विप्लव समूह प्रतिवन्धमा प्रहेका बेला प्रहरी कारवाहीमा मारिएका थिए । चितवनको भरतपुर महानगरका केही वडामा पनि सो समूहका तर्फबाट उम्मेदवारी परेको छ ।

विप्लव समूहले सिन्धुलीका तीनवटा स्थानीय तहमा उम्मेदवारी दर्ता गरेको छ । हरिहरपुरगढी गाउँपालिकामा शशी राई,दुधौलीमा प्रभात दाहाल र मरिण गाउँपालिकामा दिनेश सारु मगरले मेयरमा उम्मेदवारी हालेका छन् । भरतपुर महानगरपालिकामा दुर्गा सुवेदी र टाँडी नगरपालिकामा मिनप्रसाद सापकोटाले भोलि मेयरमा उम्मेदवारी दिने तयारी छ ।

तपाईको प्रतिक्रिया

सम्बन्धित समाचार