कोठामा युवतीको रहस्यमय मृत्यु, ‘म गण्डकीमा हाम फाल्छु’ भनी श्रीमानले लेखेको नोट फेला

पोखरा । पोखरा–१ अधिकारी टोलमा एक युवतीको शव भेटिएको छ। बाजुराको जगन्नाथ गाउँपालिका–१ बस्केनाकी १८ वर्षीया निरुता शाह बन्द कोठामा मृत भेटिएकी हुन्।

बन्द कोठाबाट दुर्गन्ध आएपछि स्थानीयले प्रहरीलाई खबर गरेका थिए। त्यसपछि घटनास्थल पुगेको प्रहरीले युवतीको पहिचान खुलाएको हो।प्रहरीले ताला फोरेर हेर्दा किशोरीको शव खाटमा लडिरहेको अवस्थामा भेटिएको थियो।

प्रहरीका अनुसार शव छेउमा उनका श्रीमान् गणेश विष्टले लेखेर छाडेको चिट थियो। चिटमा गणेशले आफू ठेकेदारकोमा काम गरेको पैसा मागेर फर्किंदा श्रीमती कोठाभित्रै झुन्डिरहेको अवस्थामा फेला परेको कुरा जानकारी गराएका छन्।

‘उनकै लागि घरपरिवार त्यागेर आएँ। उनले मलाई छाडेर गइन्। म पनि बाँचेर अर्थ छैन। म गण्डकीमा हाम फाल्छु। लास भेटियो भने हामी दुवैलाई सँगै जलाइदिनू,’ चिटमा लेखिएको छ।

निरुता र गणेश उक्त कोठामा भाडामा बस्दै आएका थिए। निरुताको परिवारले भने उनको आत्महत्या नभई हत्या नै भएको दाबी गरेको छ। घटनाबारे जानकारी पाएपछि निरुताका बुबा नन्दबहादुरले बिहीबार पोखरा आएर गणेशविरुद्ध जिल्ला प्रहरी कार्यालय कास्कीमा किटानी जाहेरी दिएका छन्। २७ वर्षीय गणेश भने हालसम्म भेटिएका छैनन्। उनले प्रयोग गर्ने फोन ‘स्विच्ड अफ’ छ।

जिल्ला प्रहरी प्रवक्ता डीएसपी सुवास हमाल पोस्टमार्टम रिपोर्टपछि मात्रै हत्या वा आत्महत्या भन्ने खुल्ने बताएका छन्। निरुताको शव पोस्टमार्टमका लागि पोखरा स्वास्थ्य विज्ञान प्रतिष्ठानमा राखिएको छ।

तपाईको प्रतिक्रिया

सम्बन्धित समाचार