प्राधिकरणको कार्यकालभित्रै पूनर्निर्माणका सबै काम सकिन्छ : पूर्व सिइओ भुसाल

‘पूनर्निर्माणका सबै कामहरु अहिले ट्रयाकमै छन्, म सन्तुष्ट छु’

  पहिलोपेज

 382 पटक हेरिएको

काठमाडौं, १३ बैशाख । राष्ट्रिय पूनर्निर्माण प्राधिकरणका पूर्व सिइओ युवराज भुसालले प्राधिकरणको कार्यकालभित्रै पूनर्निर्माणका सबै काम सम्पन्न हुने स्पष्ट पारेका छन् ।

रिपोर्टर्स क्लब नेपालले चौथो भूकम्प स्मृति दिवसका अवसरमा आयोजना गरेको विशेष साक्षात्कारमा बोल्दै भुसालले यस्तो बताएका हुन् । उनले भने, ‘‘प्राधिकरणले लक्ष्यअनुसार काम गरिरहेको छ । अध्यादेश आउँदा प्राधिकरण राम्रो संस्था थियो । ठूलो सिंहजस्तो, तर ऐन आउँदा प्राधिकरणलाई दारा र सिङ नै नभएको बनाइयो । सुरुवातमा प्राधिकरणको नाम दिइएपनि नामअनुसारको काम दिइएको थिएन ।’’

क्लबका सभापति ऋषि धमलाको सभापतित्वमा आयोजित साक्षात्कारमा बोल्दै उनले सिइओलाई अधिकार नभएको र कर्मचारी भर्ना गर्ने प्रक्रिया पनि गाह«ो भएकोले सुरुवातमै कामले गति लिन नसकेको आशय व्यक्त गरे । उनले भने, ‘‘संघीय मामिला तथा सामान्य प्रशासन मन्त्रालयले कर्मचारी पठाएन ।’’ प्राधिकरणमा अहिलेसम्म आएका सबै सिइओहरुले आफ्नो सीप र क्षमता प्रयोग गरेर काम गरेको र सबैले राम्रै गरेको पनि उनले प्रतिक्रिया दिए ।

प्राधिकरणको समयावधि अब झण्डै डेढ वर्ष बाँकी रहेकोले उक्त अवधिभित्र पुनर्निर्माणका सबै काम सम्पन्न हुनेमा आफू आशावादी भएको पनि उनले जनाए । प्राधिकरणले अब अनुदान व्यवस्थापन र वस्ती हस्तान्तरण दुईवटा महत्वपूर्ण काम गर्न बाँकी रहेकोले त्यसतर्फ द्रुतगतिमा काम अघि बढाउन पनि उनले सुझाए ।

प्राधिकरणले निजी आवास ८० प्रतिशत निर्माण गरिसकेको जनाएकोले करिब–करिब यो भनेको निजी आवास निर्माण भएकै मान्नुपर्ने उनको भनाई छ । उनले भने, ‘‘यी दुबै काम प्राधिकरणको समयावधिभित्रै सम्पन्न हुन्छ भन्नेमा म विश्वस्त छु ।’’

पुरातात्विक सम्पदाको पूनर्निर्माणको काम मसिना काम भएकोले समय लागेको भएपनि यो पनि समयमै सम्पन्न हुनेमा आफू आशावादी भएको उनको भनाई छ । पुनर्निर्माणका सबै कामहरु अहिले ट्रयाकमै रहेको र कामहरु सन्तोषजनक रहेको भुसालले जिकिर गरे । सरकारी भवन र विद्यालयहरुको ६० प्रतिशत पुनर्निर्माण भइसकेको भएपनि स्वास्थ्य क्षेत्रको काम चाहिँ बरु प्रगति नभएको पनि उनले स्पष्ट पारे ।

फरक प्रसँगमा उनले सामूहिक राजीनामा घोषणा गरेको पुनर्निर्माण प्राविधिकहरुसँग सरकारले वार्ता गर्नुपर्ने सुझाव दिए ।

तपाईको प्रतिक्रिया

सम्बन्धित समाचार