हात्तीको आक्रमणबाट दुई महिलाको मृत्युपछि अध्यक्ष प्रचण्डको चासो

  पहिलोपेज

 374 पटक हेरिएको

काठमाडौं, १४ मङ्सिर । नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले चितवनको माडीमा जंगली हात्तीको आक्रमणबाट दुई महिलाको मृत्युपछि माडीवासीले राखेको मागका विषयमा चासो दिएका छन् । सो क्षेत्रका सांसद समेत रहेका प्रचण्डले प्रमुख जिल्ला अधिकारी जीतेन्द्र बस्नेतमार्फत माडीवासीका मागका विषयमा जानकारी लिएका हुन् ।

दुई दिनअघि जंगली हात्तीले दुई महिलालाई आक्रमण गरी मारेपछि बिहीबार बिहानैबाट माडीवासी आन्दोलित भएका थिए । दिनभरको प्रयासपछि साँझ वार्तामार्फत आन्दोलन स्थगित भएको थियो । प्रजिअ बस्नेतले भने, ‘‘अध्यक्ष दाहालले माडीवासीको मागका विषयमा जानकारी लिएर त्यसलाई पूरा गराउने प्रतिबद्धता जनाउनुभएको छ ।’’ पूर्वप्रधानमन्त्रीसमेत रहेका अध्यक्ष प्रचण्डको टेलिफोनपछि प्रमुख जिल्ला अधिकारी बस्नेत आफै वार्तामा सहभागी हुन माडी पुगेका थिए । सम्झौतापछि त्यसको जानकारी आफूले प्रचण्डलाई गराएको प्रमुख जिल्ला अधिकारी बस्नेतले बताए ।

सहमतिमा पीडित पक्षलाई तत्काल माडी नगरपालिकाबाट किरिया खर्चबापत रु २५ हजार उपलब्ध गराउने, क्षतिपूर्तिबापत राज्यले उपलब्ध गराउने रकम एक महिनाभित्र उपलब्ध गराउने, यसअघिका घटनाका क्षतिपूर्ति रकम पनि एक महिनाभित्र उपलब्ध गराउने, हात्तीलाई तत्काल बस्ती प्रवेश गर्न रोक लगाई नियन्त्रणमा राख्ने सहमति भएको छ । यसैगरी प्राविधिक टोलीले उक्त हात्तीको पहिचान गरी आवश्यकताअनुसार उनीहरुको सुझावमा दाह्रा काट्ने लगायतका कार्य गर्ने सहमति भएको छ । हात्तीलाई मार्नुपर्ने अवस्था आएमा जनप्रतिनिधि र निकुञ्जको समेत सिफारिसमा सम्बन्धित निकायमा अनुरोध गर्ने, निकुञ्ज ऐनलाई समयसापेक्ष परिमार्जन गर्ने सहमति भएको थियो ।

मृतक सुशीला भण्डारीका दुई छोरालाई शिक्षाका लागि माडी नगरपालिकाले रु. ५ लाख व्यवस्था गर्ने, अर्की मृतक कृष्णकली जैसी पौडेलका छोरालाई माडी नगरपालिकामा रोजगारीको व्यवस्थापन गर्ने सहमति भएको छ । बुधबार दिउँसो रीउ खोलाको किनारमा घाँस काट्न गएका स्थानीयबासी ३५ वर्षीया सुशीला भण्डारी र ६० वर्षीया कृष्णकली जैसी पौडेलको हात्तीको आक्रमणबाट मृत्यु भएको थियो ।

यसैबीच निकुञ्जले हात्ती नियन्त्रणका लागि प्राविधिक सहितको टोली परिचालन गरेको छ । आठजना प्राविधिकसहित २० जना सुरक्षाकर्मी परिचालन भएको चितवन राष्ट्रिय निकुञ्जका प्रमुख संरक्षण अधिकृत बेदकुमार ढकालले बताए । हात्तीलाई डार्ट गरेर बेहोस बनाउने, दाह्रा काट्ने र सेटेलाइट रेडियोकलर जडान गरी छाड्न निर्देशन दिइएको छ । प्रमुख संरक्षण अधिकृत ढकालका अनुसार त्यसपछि पनि बस्ती पसेमा सो हात्ती मार्ने प्रक्रिया अघि बढाउने तयारी गरिएको छ । बिहीबार राति भने हात्ती बस्तीमा पसेको छैन । यो आर्थिक वर्षमा सो हात्तीले दुई महिलासहित ३ जनाको ज्यान लिइसकेको छ । हात्ती पर्साबाट आएको बताइएको छ ।

तपाईको प्रतिक्रिया

सम्बन्धित समाचार