कञ्चनपुरमा फेरि अर्को अपराध, दुई बालिका बलात्कारको घटना सार्वजनिक

  पहिलोपेज

 331 पटक हेरिएको

कञ्चनपुर, ३१ भदौ । १३ वर्षीया बालिका निर्मला पन्तमाथि बलात्कार र हत्या प्रकरणमा प्रहरी अनुसन्धानको कुनै टुंगोमा नपुग्दै कञ्चनपुरमै दुई बालिका बलात्कारको घटना सार्वजनिक भएको छ । बेलडाँडी गाउँपालिकाका दुई बालिकाहरुलाई बलात्कार गरेको अभियोगमा एकजना पक्राउ परेका छन् ।

बालिकाका आफन्तहरुले दुई साताघि उजुरी गरेपछि प्रहरीले शनिबार बेलडाँडी–२ का ५७ वर्षीय राजेन्द्र विष्टलाई पक्राउ गरेको हो । दुईवटै बालिकालाई दुई साताअघि बलात्कार गरेको पारिवारिक स्रोतले बताएको इलाका प्रहरी कार्यालय बेलडाँडीका प्रहरी निरीक्षक सुरेन्द्र बमले भने । परिवारले दिएको जानकारीका आधारमा शनिबार नै आरोपित व्यक्तिलाई घरबाटै पक्राउ गरिएको बताइएको छ ।

अभियुक्त विष्टले भदौ १५ गते शुक्रबार दुबै बालिका स्कुलबाट घरतर्फ फर्कने क्रममा मिठाई दिने भनी फकाएर घरमा लगेर बलात्कार गरेको आरोप लागेको छ । १५ दिनअघि नै स्कुलबाट घर फर्किंदा छोरीहरूमाथि बलात्कारको घटना भएको र मारिदिन्छु भन्दै डर देखाएको पारिवारिक स्रोतले जनाएको छ ।

पक्राउ परेका विष्टले गाँजा चरेसलगायतका नशा सेवन गरिराख्ने बताइएको छ । अभियुक्त विष्टलाई जिल्ला प्रहरी कार्यालय हिरासतमा राखिएको जिल्ला प्रहरी कार्यालयका प्रवक्ता डीएसपी कृष्णराज ओझाले बताए । “घटनाबारे बुझ्ने काम भइरहेको छ”, ओझाले भने । दुबै बालिकाको महेन्द्रनगरस्थित महाकाली अञ्चल अस्पतालमा स्वास्थ्य परीक्षण गरिएको छ । स्वास्थ्य परीक्षणपछि बालिकालाई परिवारको जिम्मा लगाइएको प्रहरीले जनाएको छ ।

तपाईको प्रतिक्रिया

सम्बन्धित समाचार