एक हप्ता नबित्दै दुबै छिमेकी मुलुक भारत र चीनमा अध्यक्ष दाहालको भ्रमण

  पहिलोपेज

 213 पटक हेरिएको


काठमाडौं । सत्तारुढ नेपाल कम्युनिष्ट पार्टी (नेकपा)का अध्यक्ष एवम् पूर्व प्रधानमन्त्री पुष्पकमल दाहाल प्रचण्ड शनिबार चीन प्रस्थान गरेका छन् । अध्यक्ष दाहाल चिनियाँ कम्युनिष्ट पार्टीको निमन्त्रणामा चार दिने भ्रमणका लागि शनिबार त्यसतर्फ प्रस्थान गरेका हुन् ।

चीन प्रस्थान गर्नु अघि उनले त्रिभुवन अन्तराष्ट्रिय विमानस्थलमा संचारकर्मीमाझ आफ्नो चीन भ्रमण दुई पार्टीबीचको सम्बन्ध सुदृढ गराउने विषयमा केन्द्रित हुने बताए । अध्यक्ष दाहालले दुई देशका सरकारबीच भएको पछिल्ला सहमति र समझदारी प्रभावकारी कार्यान्वयन गराउन आवश्यक वातावरण बनाउन पनि आफ्नो भ्रमण उपयोगी हुने विश्वास व्यक्त गरे ।

एक फरक प्रसंगमा अध्यक्ष दाहालले पार्टी संगठनहरुको एकीकरणसम्बन्धि छलफल सकारात्मक दिशामा अघि बढेको र आफू चीनबाट फर्किएलग्त्तै आवश्यक निर्णय लिने पनि बताए । उनले दशैं अघि सगठनहरुको एकीकरणको काम सम्पन्न हुने दावी पनि गरे ।

अध्यक्ष दाहालले एक हप्ता अघि भारत भ्रमणका क्रममा प्रधानमन्त्री नरेन्द्र मोदीसहित उच्च राजनीतिक भेटवार्ता गरेका थिए । एक हप्ता नबित्दै दुबै छिमेकी मुलुक भारत र चीनमा भएको अध्यक्ष दाहालको भ्रमणलाई चासोपूर्वक हेरिएको छ ।

तपाईको प्रतिक्रिया

सम्बन्धित समाचार