पहिरोले अवरुद्ध नारायणगढ–मुग्लिङ सडक दुईतर्फी खुल्यो

  पहिलोपेज

 292 पटक हेरिएको

चितवन, २७ भदौ । अविरल बर्षापछि अवरुद्ध नारायणगढ–मुग्लिङ सडकखण्ड दुईतर्फी सञ्चालनमा आएको छ । चितवनको इच्छाकामना ६ स्थित चार किलो भन्ने स्थानमा मंगलबार साँझ खसेको पहिरोले अवरुद्ध आवागमन रातिदेखि एकतर्फी खुला भएको थियो ।

आज बिहान ११ः४५ बजेदेखि भने अवरुद्ध सडक दुईतर्फी सञ्चालनमा आएको हो । सोमबार राति झरेको पहिरोको कारणले सडक अवरुद्ध भएको थियो । हिन्दू नारीहरुको महान चाड तीजको दिन सडकखण्ड अवरुद्ध भएकोले अन्य जिल्लाबाट त्यस सडकखण्ड हुँदै दर खान माइत हिडेका महिलाहरु सडकमा रातभर अलपत्र परे भने कतिपय फर्किएका थिए ।

पहिरो खसेलगत्तै नारायणगढ–मुग्लिङ सडक आयोजनाले पहिरो हटाउने काम गरे पनि १८ घण्टापछि मात्र सडकलाई एकतर्फी सुचारु गर्न सफल भएको थियो । मंगलबार दिनभर सडक अवरुद्ध भएपछि माइत जान नपाएका यात्रुहरु आज आआफ्नो गन्तव्यमा लागेका छन् ।

तपाईको प्रतिक्रिया

सम्बन्धित समाचार