संघीयताको खारेजी र चर्को करवृद्धिको विरोधमा प्रत्येक गाउँमा पुग्दै राजमो

  पहिलोपेज

 430 पटक हेरिएको

काठमाडौं, १९ भदौ । संघीयता र चर्को करवृद्धिको विरोधमा राष्ट्रिय जनमोर्चाले तुलसीपुर उपमहानगरपालिकाका प्रत्येक वडा र गाउँहरुमा आफ्नो अभियान लैजाने भएको छ । राष्ट्रिय जनमोर्चा तुलसीपुर उपमहानगरपालिकाको बैठकपछि अध्यक्ष श्यामलाल पोख्रेलद्वारा जारी विज्ञप्तिमा संघीयताको खारेजी र चर्को कर बृद्धिको विरोधमा उपमहानगरपालिकाका प्रत्येक वडा र गाउँमा अभियान लैजाने बताइएको छ ।

राष्ट्रिय जनमोर्चाले “संघीयता खारेज गर, चर्को कर बृद्धि फिर्ता गर” भन्ने मूल नाराका साथ भदौ २५ गते दिउँसो २ बजे तुलसीपुरको बीपी चोकमा कोणसभा गर्ने भएको छ । यसैगरी देशको राष्ट्रियता , स्वाधीनता र अखण्डताको रक्षा गर्नुका साथै संघीयताका विरुद्धको आन्दोलनलाई थप ब्यबस्थित गर्नको लागि असोज १ देखि मसान्तसम्म घरदैलो तथा सदस्यता अभियान चल्ने बताइएको छ ।

उक्त अभियान असोजको १ देखि ४ सम्म वडा नम्बर ४ मा, ५ देखि ९ सम्म वडा नम्बर ७ मा, १० देखि १३ सम्म वडा नम्बर ६ मा, १४ देखि १६ सम्म वडा नम्बर ५ मा, १७ देखि १९ सम्म वडा नम्बर १७ मा, २० र २१ गते वडा नम्बर १८ मा, २२ र २३ गते वडा नम्बर १९ मा, २४ गते वडा नम्बर ८ मा, २५ गते वडा नम्बर ९ मा सञ्चालन हुने विज्ञप्तिमा उल्लेख छ । विज्ञप्तिका अनुसार अरु सबै वडा र गाउँमा पनि अभियान चल्ने छ । नगर अध्यक्ष श्यामलाल पोख्रेलको अध्यक्षता र जिल्ला अध्यक्ष गणेश आचार्यको विशेष उपस्थितिमा बसेको बैठकले उक्त निर्णय गरेको बिज्ञप्तिमा उल्लेख गरिएको छ ।

तपाईको प्रतिक्रिया

सम्बन्धित समाचार