प्रधानमन्त्रीले भने, विमस्टेक शिखर सम्मेलन फलदायी

  पहिलोपेज

 400 पटक हेरिएको

काठमाण्डौ, १८ भदौ । प्रधानमन्त्री केपी शर्मा ओलीले विमस्टेक राष्ट्रहरुको चौथो शिखर सम्मेलन आयोजना र निर्णय दुबैका दृष्टिले फलदायी भएको बताएका छन् । आज सिंहदरबारमा आयोजित विमस्टेक शिखर सम्मेलन तयारी तथा व्यवस्थापन मूल समितिको अन्तिम बैठकलाई सम्बोधन गर्दै प्रधानमन्त्री ओलीले त्यस्तो बताएका हुन् ।

प्रधानमन्त्री ओलीले भने, “नेपालमा उत्पादित विद्युत अन्य देशहरुलाई बिक्री गर्न हामीलाई विद्युतीय ग्रीड चाहिएको थियो । त्यस विषयमा काम गर्न जल ऊर्जाको क्षेत्रमा सहयोगको आदान प्रदान गर्ने निर्णय गरेका छौं ।” त्यस विषयमा भारत र बंगलादेशसँग विशेष रुपमा केन्द्रीत भएर कुराकानी गरेको र त्यसबाट नेपालले भारत, बंगलादेश र म्यानमार मात्र होइन सुदूर भविष्यमा थाइल्याण्डसम्म बिजुली निर्यात गर्न सक्ने पनि प्रधानमन्त्री ओलीले बताए ।

नेपाल र नेपालीको हितलाई सर्वोपरि ठानेर विमस्टेकमा छलफल गरी घोषणापत्र जारी गरिएको बताउँदै प्रधानमन्त्रीले भने, “विमस्टेक होस वा अन्य क्षेत्रीय वा अन्तर्राष्ट्रिय मञ्च होस्, हामी न्यायोचित राष्ट्रिय हितलाई केन्द्र भागमा राखेर काम गर्छौं ।” प्रधानमन्त्री ओलीले विमस्टेक सम्मेलनको सफलताका लागि अहोरात्र मेहनत गर्ने परराष्ट्र मन्त्रालय, गृह र सुरक्षा मन्त्रालय अन्तरगतका सुरक्षा निकायलगायत सकारका सबै निकायप्रति धन्यवाद ज्ञापन पनि गरे ।

प्रधानमन्त्री ओलीले नेपाली जनता खासगरी सवारी आवागमन सहेर पनि शिखर सम्मेलन सफल पार्न योगदान गर्ने उपत्यकावासीप्रति आभार प्रकट गरे । उनले भने, “आमसञ्चारमाध्यम, बौद्धिक जगत र आमरुपमा सबैप्रति धेरै धेरै धन्यवाद व्यक्त गर्दछु ।”

तपाईको प्रतिक्रिया

सम्बन्धित समाचार