पूर्वमहानिरीक्षक खरेलको आत्मकथा पढेपछि यसरी बम्किए बामदेव गौतम

  पहिलोपेज

 780 पटक हेरिएको

काठमाडौँ, २२ असोज । नेपाल कम्युनिष्ट पार्टी (नेकपा)का वरिष्ठ नेता वामदेव गौतमले नेपाल प्रहरीका पूर्व महानिरीक्षक अच्युतकृष्ण खरेलले आफ्नो चरित्र हत्या गर्न खोजेको बताएका छन् । खरेलको “आत्मकथा”मा आफ्नो चरित्र हत्या गर्न खोजिएको नेता गौतमको दावी छ ।

वरिष्ठ नेता गौतमले आज आफ्नै निवासमा पत्रकारसँग कुराकानी गर्दै पूर्वउपप्रधान तथा गृहमन्त्री समेत रहेका गौतमले खरेलले प्रकाशित गरेको “अच्युतकृष्ण खरेल आत्मकथा”मा आफूलाई लक्ष्यित गरी एक पत्रकारमार्फत रु. २० लाखको प्रस्ताव पठाउँदा अस्वीकार गरेको झुठा कुरा लेखेर चरित्र हत्या गर्न खोजेको बताए ।

“खरेलको आत्मकथामा मैले कुन पत्रकार पठाएर रु २० लाख प्रस्ताव गरें । २० लाखको प्रस्ताव लिएर आउने त्यो पत्रकार को थियो ? त्यो खरेलले पुष्टि गर्नुपर्दछ”, नेता गौतमले भने, “आफ्नो आत्मकथामा मेराबारे तथानाम जे पायो त्यही झुटा असत्य कुरा लेखेर चरित्र हत्या गर्न खोज्ने ?” उनले खरेलले आइजीपीबाट हटाएको बदला आफ्नो आत्मकथामार्फत सार्वजनिक गरेको दाबी गरे ।

खरेलले लेखेका कुरामा कुनै सत्यता नभएको उल्लेख गर्दै नेता गौतमले स्थानीय निर्वाचन गर्न नसक्ने भएपछि पार्टीको निर्देशनमा खरेललाई प्रहरी प्रमुखबाट हटाएको दावी उनले गरे ।

“मलाई खरेललाई हटाउने चाहना थिएन । म गृहमन्त्री भइसकेपछि तत्कालीन पार्टी अध्यक्ष मनमोहन अधिकारी र महासचिव माधव नेपालले पहिलो काम स्थानीय निर्वाचन गर्नुपर्दछ भन्नुभएको थियो”, गौतमले थपे, “तर, खरेलबाट स्थानीय निर्वाचन हुने सम्भव देखिएन । अनि बाध्य भएर पार्टीकै निर्देशनमा तत्कालीन प्रधानमन्त्री लोकेन्द्रबहादुर चन्दको सहमतिमा खरेललाई हटाएको हुँ ।” खरेललाई नहटाएको भए स्थानीय तहको निर्वाचन हुनै नसक्ने नेता गौतमको दावी थियो ।

तपाईको प्रतिक्रिया

सम्बन्धित समाचार