धर्नास्थलबाट कृष्ण पहाडीसहित २५ जना मानवअधिकारवादीहरु गिरफ्तार

पहिलोपेज

काठमाडौं, २६ असार । प्रधानमन्त्री कार्यालय सिंहदरवार अगाडि आयोजना गरिएको धर्ना कार्यक्रमबाट प्रहरीले मानवअधिकारवादी नेता कृष्ण पहाडीसहित २५ जनालाई गिरफ्तार गरेको छ । नेपाल कम्युनिष्ट पार्टी (नेकपा) नेतृत्वको सरकारले गरेका निर्णयहरुलाई “स्वतन्त्रता विरोधी निर्णय” र “स्वेच्छाचारी गतिविधि”हरु भन्दै मानवअधिकार तथा शान्ति समाजले धर्ना कार्यक्रमको आयोजना गरेको थियो ।

दिउँसो १ बजे धर्ना प्रारम्भ हुनासाथ प्रहरीले समाजका संस्थापक सभापति कृष्ण पहाडी, सभापति डा. गंगाधर अधिकारी, सल्लाहकार होमकान्त चौलागाई, संस्थापक सदस्य कृष्ण कँडेल, उपसभापति रेनुका पौडेल, महासचिव उत्तम पुडासैनी, सचिव बलबहादुर गाहा मगर, कोषाध्यक्ष बटुकृष्ण ढुंगेल, ललितपुर शाखा सभापति चन्द्रमणि बञ्जारालाई गिरफ्तार गरेको हो । गिरफ्तार हुने अन्य धर्नाकारीहरुमा विभागीय संयोजकहरु प्रताप पौडेल, जयराम पुडासैनी, बाबुराम न्यौपाने, जगन्नाथ पुडासैनी, विपी पौडेल सदस्यहरु सनत आचार्य, रामचन्द्र खतिवडा, रेजिना राई, सुकदेव अधिकारी, ईश्वर पुडासैनी, भगवान पुडासैनी, गोकुल पुडासैनी, सुरज कुमार बोहरा, टंकप्रसाद गैरे, मुरारी प्रसाद फुयाल, ईश्वरीप्रसाद नेपालसहित २५ जनालाई गिरफ्तार गरी महानगरीय प्रहरी वृत्त सिंहदरवारमा राखिएको शान्ति समाजका कार्यक्रम अधिकृत सरिता शर्माले जानकारी दिइन् ।

धर्नामा स्वतन्त्रता विरोधी निर्णय खारेज गर, स्वेच्छाचारी गतिविधि बन्द गर, शिक्षामा माफिया चलखेल अन्त्य गर, स्वास्थ्यमा माफिया चलखेल अन्त्य गर, सत्याग्रहीको जीवन रक्षा गर, अपराधीलाई संरक्षण बन्द गर लगायतका प्लेकार्ड प्रदर्शन गरिएको थियो ।

“नेपाल कम्युनिष्ट पार्टी नेतृत्वको वर्तमान सरकारले आधारभुत स्वतन्त्रता र मानव अधिकार कुण्ठित हुनेगरी कतिपय निर्णय गरेको छ”, शर्माले जारी गरेको विज्ञप्तिमा भनिएको छ, “न्यायिक निर्णयहरुलाई समेत लत्याउँदै आपराधिक चरित्रलाई संरक्षण र प्रोत्साहन गरेको र पछिल्लो चरणमा सरकार हिंसात्मक प्रवृत्तिप्रति नरम र सत्याग्रहीहरुप्रति क्रुर बन्दै गएको अवस्थामा आधारभूत स्वतन्त्रता, मानव अधिकार संरक्षणका लागि शान्ति समाजले प्रक्षेपण गरेको आन्दोलन अन्तर्गत असार २६ मा आयोजित यो पहिलो धर्ना हो ।” समाजले असारसम्मको चरणवद्ध कार्यक्रम सार्वजनिक गरेको छ भने साउनका लागि पछि कार्यक्रमको घोषणा गरिने जनाएको छ ।

प्रकाशित मिति : मङ्गलवार, आषाढ २६, २०७५ समय : १४:५६:४२ 131 पटक पढिएको

Android App

Download android application

Pahilopage android application in Play Store

Masina_ghaderi

Masina_ghaderi